"მალე პირველი ღამე სოციალური ქსელის დახმარებით ექნებათ"

ბოლო დროს ადამიანი ინტერნეტზე აბსოლუტურად დამოკიდებული გახდა. მისი საშუალებით უამრავ საქმეს აგვარებს, პირად ცხოვრებასაც კი. ოჯახის შექმნასაც ინტერნეტის დახმარებით ცდილობს და ასე თუ ისე ახერხებს კიდეც. ზოგს უმართლებს, ზოგი  კი იმედგაცრუებული რჩება. მაგალითად, "საქართველოს ვარსკვლავის" მონაწილემ, ნუკა გვალიამ თავისი მეორე ნახევარი ერთ-ერთი ინტერნეტთამაშის საშუალებით გაიცნო და თავს ბედნიერ ადამიანად მიიჩნევს. მაგრამ როგორც არ უნდა იყოს საქმე, სოციალური ქსელის საშუალებით შექმნილ ოჯახებთან დაკავშირებით საზოგადოებას არაერთგვაროვანი მოსაზრება აქვს. ზოგს მიაჩნია, რომ რაც ჩვენს სინამდვილეში ინტერნეტი გაჩნდა, ქორწინების რიცხვმა მოიმატა, მაგრამ ზოგი თვლის, რომ ასეთი გზით შექმნილი ოჯახები იშვიათად ამართლებს.

გიორგი ნაზღაიძე, ტოპმოდელი:
- ჩემი მეორე ნახევარი ინტერნეტით არ გამიცვნია, უბრალოდ მას ხელი ერთ-ერთი გადაცემის საშუალებით ვთხოვე, (უცხოეთშიც იყო) იმ გადაცემას შოუსთვის სჭირდებოდა ეს, მანამდე მისთვის ხელი უკვე ნათხოვნი მქონდა... ისე, სოციალური ქსელის საშუალებით დაოჯახების სასტიკი წინააღმდეგი ვარ.

- რატომ?
- მიმაჩნია, რომ ასეთი გაცნობა არ არის ჯანსაღი. არადა, სამწუხაროა, რომ დღეს ყველა ამაზეა გადასული, - მოდი, გოგოს ინტერნეტით შევაბამ, - უმრავლესობა ამას ფიქრობს. თუმცა თვითონაც ბევრჯერ მინახავს ამა თუ იმ გადაცემაში სტუმრად მისული წყვილები, რომლებიც ინტერნეტის საშუალებით დაქორწინებულან. არადა, წადი რა, კლუბში, ბარში, რესტორანში, გაიარე, გაერთე და გოგოსაც შეაბამ.

- ყველას ხომ არ აქვს იმის საშუალება, რომ ბარში, კლუბში წავიდეს?
- კი, ესეც გასაგებია, მაგრამ როგორც არ უნდა იყოს, ინტერნეტით ქორწინების წინააღმდეგი ვარ! მაგრამ ისეა ხალხი სოციალურ ქსელს მიჯაჭვული, რომ მგონია, პირველი ღამეც სოციალური ქსელის დახმარებით ექნებათ და მერე "სოციალური შვილებიც" გაუჩნდებათ... მე მაინც ყველას ვურჩევდი, წავიდნენ სადმე კურორტზე, ზღვაზე, საზაფხულო ფლირტით გაერთონ და მიხვდებიან, უნდათ თუ არა სამომავლოდ ერთმანეთი...

ნინო არაზაშვილი, ტელეპროდიუსერი:
- ჩემს ბავშვობაში, გოგონები ეზოში რომ ჩადიოდნენ, მახსოვს, საგანგებოდ გამოიპრანჭებოდნენ, რომ მერე ბირჟასთან ჩაევლოთ, სადაც ბიჭები იყვნენ შეკრებილები. მე იმ პერიოდში წიგნებთან ვიჯექი, მაგრამ მახსოვს, როგორ მირეკავდნენ ხოლმე გოგები, ჩემი მეგობრები და მიყვებოდნენ, - დღეს ამას მოვეწონე და ამან კომპლიმენტი მითხრაო. ეს მაშინ გაცნობისა და დაახლოების ერთგვარი ფორმა იყო. ისევე, როგორც ეს თუ ის თამაში, მაგალითად, რეზინობანა, ან კლასობანა... დღეს ასეთ თამაშებს ჩემ გარშემო ვერსად ვამჩნევ. სამაგიეროდ ბავშვები, თინეიჯერები, მოწიფული ადამიანები ინტერნეტთამაშებით არიან გართულები. ამის მაგალითად გამოდგება ნუკა გვალიასა და მისი მეუღლის ურთიერთობა, რომელიც სწორედ ასეთი ინტერნეტთამაშით დაიწყო... მოკლედ, ძველად ქუჩაში, სტუმრად, ოჯახებში იცნობდა წყვილი ერთმანეთს და ვფიქრობ, რომ ის მეტად იძლეოდა ერთმანეთის შეცნობის საშუალებას. ახლა კი სოციალური ქსელით გაცნობილი ადამიანები ოჯახის შესაქმნელად ძალიან სწრაფად იღებენ გადაწყვეტილებას. არადა, მანამდე ერთმანეთი ბევრ რამეში უნდა გამოსცადონ. იმიტომაც არის, რომ მალე ინგრევა ასეთი ურთიერთობა. არის იმედგაცრუება... თუმცა სულ თავიდან, მახსოვს, წყვილი ერთმანეთს გაცნობის საიტის  საშუალებით ეკონტაქტებოდა. ასეთები იყვნენ ჩემი თანამშრომლები, რომლებმაც აღნიშნული საიტის მეშვეობით გაიცნეს ერთმანეთი და უკვე 10 წელია, ერთად ბედნიერად ცხოვრობენ...

ცოტა ხნის წინ სასწავლებლად ამერიკაში გახლდით და ახლოს გავეცანი ამერიკელების ყოფას. ოჯახი მათთვის სერიოზული კულტია. თუ შექმნეს, მას აღარ დაანგრევენ, მაგრამ ოჯახის შექმნამდე ისინი ერთმანეთს სერიოზულად ეცნობიან... ცუდი არ არის სოციალური ქსელის საშუალებით დაოჯახება, მაგრამ ქართველები ამ ნაბიჯის გადაგმისას ჩქარობენ. მეტი წინდახედულებაა საჭირო...

გია ჯაჯანიძე, ფსიქოლოგი:
- ჩემ გარშემო არაერთი ახლობელია, რომელსაც ინტერნეტის საშუალებით გაუცვნია საპირისპირო სქესის წარმომადგენელი. ზოგჯერ ასეთი გაცნობა ოჯახის შექმნითაც დაგვირგვინებულა, მაგრამ არსებობს რისკ-ფაქტორები, რომელსაც სოციალურ ქსელში ადამიანები არ ითვალისწინებენ და ხდებიან ასეთი ურთიერთობის მსხვერპლნი. რასაც შემდგომ გულისტკენა, იმედგაცრება მოჰყვება. ვირტუაურ სამყაროში ადამიანი, როდესაც საპირისპირო სქესის წარმომადგენელს ელაპარაკება, ყოველთვის აკონტროლებს თავს, ცდილობს, იყოს მომხიბლავი, ზრდილობიანი, თავის გვერდზე ასეთივე სურათიც (ფოტოშოპში დამუშავებული) აქვს განათავსებული. ცდილობს, იყოს თბილი, ყურადღებიანი, თანამოსაუბრეს ელაპარაკოს ლექსებით, რომ რაღაცნაირად თავი მოაწონოს საპირისპირო სქესის ადამიანს. თუმცა რეალურ ცხოვრებაში ის საპირისპიროა... ამას წინათ 42 წლის ქმარგაცილებული ქალბატონი დამიკავშირდა, რომელმაც მითხრა, რომ მის შებმას "ფეისბუკის" საშუალებით 25 წლის ბიჭი ცდილობდა, ლამის კოშკებს უგებდა, მაგრამ ქალბატონს ეყო ჭკუა და არ წავიდა ამ კონტაქტზე. ასეთ ფაქტს აფერასაც ვერ დავარქმევ, ეს უფრო გართობას ჰგავს, მაგრამ ამგვარ გართობა-გართობაში შექმნილი ოჯახები მალე ინგრევა!

ადრე გარიგებით რომ ქორწინდებოდნენ, მაინც მთელი ცხოვრება ერთმანეთის შეცნობაში იყვნენ და ასე უეცრად როგორ შეიძლება ოჯახის შექმნა, ვერ წარმომიდგენია.

ისე, გართობის მიზნით, მეც მქონია ინტერნეტფლირტი, მაგალითად, მომწონებია ესა თუ ის ქალი და კომპლიმენტებით ამივსია... მოკლედ, მქონია ერთი ღამის "ინტერნეტპროსტიტუცია"...